Anghenion Dysgu Arbennig - ond dim ystyriaeth i anghenion ieithyddol
25 Gorffennaf 2014
Anghenion Dysgu Arbennig - ond dim ystyriaeth i anghenion ieithyddol
Mae Dathlu'r Gymraeg wedi ymateb yn feirniadol i Bapur Gwyn gan Lywodraeth Cymru sy'n diwygio'r drefn ar gyfer plant a phobl ifanc ag Anghenion Dysgu Ychwanegol.
Dywedodd Penri Williams, Cadeirydd Dathlu'r Gymraeg, "Er bod y cynigion yn gyffredinol synhwyrol, mae'r Papur Gwyn yn gwbl ddiffygiol mewn perthynas ag anghenion ieithyddol. Heblaw am un cyfeiriad byr at Strategaeth Addysg Cyfrwng Cymraeg y Llywodraeth, nid oes yr un cyfeiriad arall at y Gymraeg yn y ddogfen.
"Mae anghenion dysgu ychwanegol yn faes ble y gwyddom o brofiad bod teuluoedd yn cael anawsterau i dderbyn darpariaeth yn y Gymraeg. Byddai diwygio'r drefn yn rhoi cyfle euraidd i sicrhau gwell darpariaeth - ac i roi hawl i dderbyn y gwasanaeth yn y Gymraeg. Ond nid yw Llywodraeth Cymru wedi manteisio ar y cyfle, nac hyd yn oed wedi cydnabod yr anawsterau a'r galw presennol.
"Mae'r ddiffyg sylw llwyr i'r Gymraeg ac anghenion ieithyddol y plant hyn yn dipyn o sioc, a byddwn, fel mudiadau ar y cyd, yn pwyso ar y Llywodraeth i sicrhau bod cyfeiriadau priodol yn y Mesur drafft pan gaiff ei gyhoeddi yn yr hydref."
- Mae Llywodraeth Cymru wedi bod yn ymgynghori ar Gynigion Deddfwriaethol ar gyfer Anghenion Dysgu Ychwanegol – Papur gwyn.
- Mae'r dyddiad cau ar ddydd Gwener, 25 Gorffennaf: http://wales.gov.uk/consultations/education/proposals-for-additional-learning-needs-white-paper/?lang=cy
Dathlu'r Gymraeg: www.dathlu.org